MARURAT TU GINJANG MARBULUNG TU TORU

Ooo… ai ido hape lapatanna…..?
Ido alus na tarbege huhut unduk-unduk laos mengkel suping natorop i, di na mandok hata sahalak Amanta Sintua utusan sian Huria di tingki parmonding ni sada natuatua, di na maralaman jala nanaeng taruhononhon tu udean.
Taho do antong partorop ni Ama, Ina di tingki i ai mardomu sigagat duhut do dibuat suhut songon dalan partangiangan di parmonding ni natuatua i.
Mamintor tarida do reaksi ni Situan na torop siala pandohan ni Amanta Sintua i, ai nunga suhar i didok roha ni natorop i sian pandohan na somal di ruhut-ruhut umpama/falsafah ni halak Batak na mandok : Marurat tu toru marbulung tu ginjang, dohot lapatanna : hagabeon di anak/boru, gabe pataridahononna ma bulungna isara di pesta songon on. Asing ma jolo rupani molo di huling-hulingan : alas ni pandohan na di ginjang i taboto be do i, i ma : jenggot.
Ai manang piga hali didok amanta Sintua i: “marurat…. “tu toru”, ninna natorop. “Tu ginjang”, ninna Sintua i; marbulung. .. “tu ginjang”, ninna natorop. “Tu toru”, ninna Sintua i muse. Gabe hira na masialus-alusan. Marngongong do soara sian natorop i laho huhut manalahon Sintua i dohot pandohan marhata metmet, songon panginsahion na asal didok Sintua i umpasa i. Ndang pola dilehon Amanta Sintua i hatorangan na tangkas aha tujuan ni pandohan i, hira na dipasombu nasida natorop i laho manimbangi jala mamutushon sintong do i manang ndang.
Di tingki laho paujunghon Amanta Pd. Resort, di jamita nasida di buat do sada teks na menguatkan pandohan na sian Amanta Sintua i. Ndang na manutup-nutupi hasalaan-hasalaan ni Sintua i Pandita i alai tung i do antong sintongna gabe lam tamba tegangna ma idaon situasi untegang sian perasaan ni keluarga ni na monding i na paadop-adop nahinaholongannasida i, na tongkin nari ndang idaonnasida be.
Dibuat Amanta Pandita i do turpuk ni jamita nasida Kolosse 3,2. huhut dipadomu tu Heber 13,14 dohot 2 Petrus 3,13-14. Dohot pangarimpunan : Banua Ginjang do sambulo jadi tu ginjang do urat ni ngolu ni angka na porsea i. Urat i, i ma pangkirimon, haporseaon, jadi molo tu Banua Ginjang do, goarna ma daina: tu ginjang, jadi dos dohot marurat tu ginjang. Lapatanna ni marbulung tu toru, i ma parsaoran, panindangion dohot ngolu na so nilohotan ni angka na di toru, gariada ingkon manaiti na di toru asa laho tu ginjang, gabe apul-apul jala soso-soso di angka na marsak, na tarilu-ilu, na matean. Ai ndang suhat-suhat na di tano on gabe suhat-suhat di Harajaon ni Debata, alai halak na marurat tu ginjang ingkon marparbuehon (marbulung) tu toru hombar to pandohan : “martua”.
Ai aha ma gunana di halak nang sude portibi di omo, hagabeon dohot hamoraon, ianggo rugi do tondina. Ido lapatan ni marurat tu ginjang marbulung tu toru. Sederhana sambing do nian hato-rangan ni Pandita i, alai boi torang gabe apul-apul tu keluarga na marsitaonon i, jala gabe mangalusi : ra patangkashon pandapot ni situan na torop i, gabe dapot pandohan na diginjang i songon alus ni na torop : Oooo… i do hape lapatanna …. mauliate ma.

Pdt. K. Hutabarat.
Sp Imm No 11 Agustus 1979, p.36-7

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s