Archieving “Pesta Gotilon HKBP PTI 2016”

PARTORDING NI PARMINGGUON
PESTA GOTILON HKBP PTI 2016
HKBP PONDOK TIMUR INDAH, RESSORT PTI
Minggu, 13 Nopember 2016 Pukul 09.00 Wib

Thema: “Habibinsar Ni Mata Ari Hasintongan Dohot Hamalumon” (Maleaki 3,20a)

1. JOUJOU PARSOMBAON : (L : Liturgis; U : Uluan; H : Huria)
Persiapan : Martangiang parhobason ma sude angka parhalado dohot panitia dohot sude na naeng prosesi.
Prosesi : Mulai 08.45-09.00 Wib. Angka ama, ina dohot sikola minggu naung dipillit mardalan di prosesi sian bilut parhobasan tu bagas parmingguon laos pasahathon angka silua tu parhalado. Di jolo ma ama ina, dungi angka dakdanak ma  baris dua.
Laos borhat ma sude parhalado jongjong di altar manjalo haroro ni prosesi i
Iringan musik BE No. 585..
Dung sahat prosesi i, dipasahat ma angka na binoanna tu parhalado sadasada, dungi pintor jongjong ma muse satongkin mangadop tu ruas paima sude na prosesi pasahathon angka na binoanna. Parhalado ma manjalo angka eme, kalapa dohot na asing dipeakhon ma i di atas ni inganan na pinarade di inganan pelean i.
Dakdanak mamboan bunga, dijalo parhalado ma i sada be, ris dungi dipadomu ma i sude tu vas bunga na adong di atas ni meja altar.
Dung sidung sude mulak ma angka na dohot prosesi i tu bilut parhobasan sian i ma nasida mulak tu hundulanna be.
Songon i ma parhalado dung sidung hundul ma tu hundulanna be.

L : Huria ni Debata na dihaholongan ni Tuhanta Jesus Kristus, hami saluhut Parhalado, pasahathon tabe ma tu sude hamu ruas ni huria : Asi ni roha jala dame na sian Tuhanta, ima na mangaramoti hita saluhutna.
Di bagasan sadarion tung tama do hita mandok mauliate tu Debata, disaluhut pandonganion dohot pangaramotion ni Debata di sude pardalan ni ngolunta. Di ari sadarion dipaloas Debata huria-Na, patupahon PESTA GOTILON, manghalashon pasupasu dohot denggan basa ni Jahowa dibagasan ngolunta. Saluhutna i tung asi ni roha ni Debata do i tu hita.
Ala ni i tapuji ma Tuhanta jala tasomba ma Ibana, taendehon ma “Somba Ma Jahowa Debanta”

H : (Mangendehon BE 585: 1 “Somba ma Jahowa”)
Somba ma Jahowa Debatanta Amen haleluya
Sigomgom langit tano on ro di isina Amen haleluya
Beta hita lao marsinggang tu joloNa Amen haleluya
Na songkal jala na badia do Jahowa Amen Haleluya
Endehon Amen haleluya, endehon amen haleluya
endehon amen haleluya
Endehon amen haleluya, endehon amen haleluya

L : Tung so tarasam hita do balga ni asi dohot holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Antong haholongi ma Debata sian nasa roham, sian nasa ateatem dohot sian nasa pingkiranmu. Ro be ma hamu tu adopanNa jala somba ma Ibana.

H : Puji ma Jahowa Debatanta, Amen Haleluya
Parasi roha na sumurung do Ibana, Amen Haleluya
Taendehon ma goar ni Debatanta, Amen Haleluya
Alani denggan ni basaNa na tu hita, Amen Haleluya
Endehon; Amen Haleluya, endehon Amen Haleluya
Endehon Amen Haleluya, endehon Amen Haleluya.
L : Pillit ma sadarion, manang na ise do sioloanmu: hagogoon portibion do manang Debata si lehon hangoluan? Pillit ma sadarion manang na ise si sombaonmu: debata sileban do manang Debata sitompa langit dohot tano.
H : Alai anggo au dohot donganhu sajabu, Jahowa do sioloannami.
… jongjong …

2. VOTUM INTROITUS
L : Marhitehite goar ni Debata Ama dohot goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on,
H : Amen.
L : Songon on do didok Tuhan Jahowa ;Ndang be ulahanKu mangaragehon nasa na mangolu, songon na hubahen i.
H : On pe saleleng adong tano on, ndang jadi mansohot saburon dohot gotilon, ari ngali dohot aril as,ari logo dohot rondo ni ari, arian dohot borngin,
L : Na balga situtu do Ho, ale Jahowa Debatangku, marpahean hasangapon dohot hamuliaon do Ho. Haleluya.
H : (mangendehon: BE 854 “Haleluya..”
Haleluya, haleluya, haleluya, haleluya, puji Tuhan!
Haleluya, haleluya, haleluya, haleluya, puji Tuhan!
Puji Tuhan haleluya! Puji Tuhan haleluya
Puji Tuhan haleluya! Puji Tuhan.

L : Martangiang ma hita: Ale Debata Amanami na di banua ginjang. Ho do haroroan ni sude denggan basa na marragamragam i. Alani pasupasuM do umbahen marparbue sude na niula ni tangannami, jala diparmudu Ho do hami na tinompaM, asa unang rapar. Dibahen i marpungu hami nuaeng mandok mauliate sian nasa rohanami tu Ho. Sian tanganMu do sude hujalo hami nasa na denggan tu dagingnami dohot tu tondinami, jala asi ni rohaM do mangaradoti hami. On pe sadarion dilehon Ho do las ni roha tu huriaM, na boi patupahon Pesta Gotilon, alani sai jalo ma hamuliateon ni rohanami. Angkup ni i sai lehon ma tondiM tu hami, na mamuhai dohot patiurhon mata ni rohanami, asa lam huida hami sude na denggan, nauli na pinatongonMi tu hami, asa lam ringgas rohanami mamuji dohot pasangaphon Ho marhite Tuhan Jesus Kristus Tuhannami, Amen.
— hundul —
3. Koor : Pararikamis

4. MARENDE BE 373: 1 “MANGULA HITA JOLMA”
Mangula hita jolma Manabur boni i; Alai anggo jadina Di Debata do i
Dilehon las ni ari, nang nambur udan pe.
Tongtong di panumpakNa, marguru sasude.
Nasa ulibasa ro sian Debata; I pe Ibana puji ma, huhut haposi da.

5. PATIK NI DEBATA :
L : Tangihon hamu ma patik ni Debata na nienet sian 5 Musa 16, 9-10+17, songon on ma didok: “Ingkon pitu minggu bilangonmu di ho; olat ni dung mamungka madabu sasabi tu eme, pungkaonmu ma mamilangi na pitu minggu i.
H : Dungi marari raya minggu ma ho di Jahowa, Debatam, marguru tu pangalehon ni tanganmu di pelean sian lomo ni roha silehononmu, hombar tu pamasumasu ni Jahowa, Debatam di ho.
L : Ganup tahe marguru tu na tarlehon tanganna, hombar tu pasupasu naung dilehon ni jahowa, Debatam tu ho.”I ma sahatna : antong rap mangido gogo ma hita tu Debata :
H : Ale Tuhan Debata sai pargogo i ma hami, mangulahon na hombar tu patikMi, Amen.

6. Koor : Remaja & Naposobulung HKBP PTI

7. MARENDE BE 760: 1+2 “JESUS DO ALEALENGKU”
1. Jesus do alealengku soada tudos ni aleale na sumurung i di au.
Hasoloan ni rohangku Tuhan haposanki, Sipalua na mamorsan dosangki,
Na mangapuli au di sitaononki mangurupi au di hagogotan i.
Reff. Jesus do alealengku soada tudosMi;
aleale na sumurung i di au
2. Tuhan Jesus do mamorsan sude na dosangki napalua au sian pangago i,
Hutanggali ma luhutna, jolma na buruk i hupelehon ngolungki tu Tuhan i
Molo pajumpang sogot au dohot Tuhan i idaonku ma hamuliaon na i.
Reff. Jesus do alealengku soada tudosMi;
aleale na sumurung i di au
… jongjong …

8. PANOPOTION DI DOSA
L : Huria ni Debata na nihaholongan ni Kristus. Dibagasan unduk dohot serep ni roha, ro ma hita tu adopan ni Debata. Tatopoti ma dosanta tu Amanta Debata, jala tapangido ma hasesaan ni dosanta, dibagasan goar ni Tuhan Jesus Kristus Parasi roha i. Martangiang ma hita dibagasan rohanta be : Ale Debata Amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosanami na godang i. Tung mansai jotjot do hami manirpang sian dalanMu, ndang mangulahon lomo ni rohaM. Nuaeng ro hami tu joloM mangido asi ni rohaM : Sai sesa ma sude dosa nami jala unang paingotingot sude dosa nami na godang i. Unang ma pabali hami sian adopanMu ale Jahowa, ala ni dosa dohot hajahatonnami. Alai marpamuati ma rohaM di hami. Huparhatopot hami do, jotjot do hami lilu songon birubiru masitondong dalanna be. Ndang be huulahon hami lomo ni rohaM. Asi ma roham di hami ale Debata, jala sesa ma sude dosa nami..

H : Ale Tuhan, asi ma roha di au

L : Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho. Ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangolu hami, Amen.
..Tingki Na Hohom..

L : Huria ni Debata naung manopoti dosa, nuaeng tabege ma hata bagabaga ni Debata, taringot tu hasesaan ni dosanta: Songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho. Hasangapon ma di Debata do ginjang..
Sude : Amen.
… hundul…
9. Koor : Ama

10. MARENDE BE 645: 1+3 “Ro Ma Ho Parasiroha”
1. Ro ma Ho parasi roha sai pa girgir rohangkon
mangendehon denggan basa ni lehonMu di au on
Tituonhu ma suruan mangendehon sangapMi
Pujionhu H o Jahowa partanobatoanhi.
3. Ganup ari au marutang na so hagararan au
Ndang tarasam denggan basa na binaenMu na tua au
Sai tarunjun do rohangku maninggalhon holongMi
Sai sahapi ma rohangku, ngolungki di Ho ma i

11. EPISTEL (2 Tessalonik 3, 6-13)
L : Alai mangasahon Goar ni Tuhanta Jesus kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami!
H : Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna;
L : Ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen.
H : Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami.
L : Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan!
H : Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama.
L : Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon.
H : Alai anggo hamu, ale angka dongan, unang ma marnaloja hamu mambahen na denggan!
L : Disi sahatna, martua do angka na tumangihon hata ni Debata jala na umpeopsa.
Sude : Amen.

12. Koor : Wllayah V
13. MARENDE BE 753 : 1+3 “Dipardalanan Jesus”
1.Dipardalanan Jesus dijolongku, Holong ni tanganMi manogu au
Nang di ngoluku Ho do sombaongku, Tung sonang mardalan raphon au.
Huboto do tangkas pangouonMu, Diiringiring Ho do langkangki
Sahat ro di ujung ni pardalanku, Togu ma au jonok tu lambungMi,
— jongjong —
Ayat 3…
Wanita : Patogu ma Tuhan haporseaonku, Asa polin tu Ho manghirim au,
Pria : Tu surgo i patulus pardalananku, TondiMi maringan ma di au.
Wnt : Huboto do tangkas pangouonMu,
Pria : Diiringiring Ho do langkangki
Sude : Sahat ro di ujung ni pardalanku, Togu ma au jonok tu lambungMi,

14. MANGHATINDANGHON HAPORSEAON
15. Tingting
(Laos Mandok Hata Panitia Pesta Gotilon HKBP PTI 2016)

16. Koor : Debora

17. MARENDE BE 754: 1-4 “Gok Las Ni Roha Do Au”
(Pasahathon Pelean 1a, 1b)
1. Gok las ni roha do au di ngolungkon, di ngolungkon, di ngolungkon
Gok las ni roha do au di ngolungkon, tongtong di rohangkon.
Reff. Mauliate gok las ni roha, maringan holongMi Tuhan di au.
Mauliate gok las ni roha, maringan holongMi Tuhan di au.
2. Mardame jala sonang do ngolungkon, dirohangkon, dirohangkon.
Mardame jala sonang do ngolungkon tongtong dirohangkon.
Ref. Mauliate …
3. Gok do holong ni Jesus di ngolungkon, di ngolungkon, dingolungkon.
Gok do holong ni Jesus di ngolungkon, tongtong dirohangkon.
Reff. Mauliate …

18. JAMITA : Maleaki 3, 19-20a (Indonesia : Maleakhi 4, 1-2a)

Ai ida ma, na ro ma ari na marsigorgor, songon pamurunan, jadi doshon durame sude halak na jungkat dohot halak siulahon hajahaton, gabe marsijembur ma nasida bahenon ni ari na ro sogot, ninna Jahowa Zebaot, ndang adong tadingkononna di nasida nang urat, nang ranting.
Alai binsar ma anggo di hamu, angka na mangkabiari goarhu mata ni ari ni hatigoran mardongan hahisaron di linggom ni habongna.

Bahwa sesungguhnya hari itu datang, menyala seperti perapian, maka semua orang gegabah dan setiap orang yang berbuat fasik menjadi seperti jerami dan akan terbakar oleh hari yang datang itu, firman TUHAN semesta alam, sampai tidak ditinggalkannya akar dan cabang mereka.
Tetapi kamu yang takut akan nama-Ku, bagimu akan terbit surya kebenaran dengan kesembuhan pada sayapnya.

19. ACARA PASAHATHON PELEAN DOHOT AMPLOP GOTILON
U : Hamu dongan sahuria! Nunga i tajalo denggan basa dohot asi ni roha sian Jahowa. Ta okuhon do, saluhutna silehonlehon na denggan, nasa ulibasa na mauliutus, ima na ro sian ginjang. Dilehon do di hita parbueni tano, parbueni suansuanan dohot parbueni angka ulaonta. Saluhutna i nunga tajalo sian Jahowa. Antong nda tama ma hita mandok maulite tu Debata?
H : Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.
U : Antong taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponKu di hamu angka pandiloan ni langit, jala mangusehon tu hamu gabe maradu marlobilobi.. (Maleaki 3,10)

Marende BE 848: 1-3 “Dison Adong Huboan Tuhan”
Dison adong huboan Tuhan, parbue ni ngolungku na so tardok nian
Sadia ma argana Tuhan, Molo sai ni rajuman sude denggan basaM
Jalo ma Tuhan, Sai las ma rohaM
…musik…
Huingot do hataM da Tuhan, ingkon sarihononhon anggim na metmetan
Ampehon ma tanganMu sangkan, itak na otik i unang suda nian
Jalo ma Tuhan, sai las ma rohaM.
…musik…
Huingot do hataM da Tuhan, ingkon sarihononhon anggim na metmet an
Ampehon ma tanganMu sangkan, itak na otik i unang suda nin
Jalo ma Tuhan, sai las ma rohaM.

U : Tadok ma mauliate tu Jahowa, ai pardenggan basa do Ibana, ro di saleleng ni leleng na do asi ni rohaNa tu hita. Nunga tapasahat siluanta tu huria-Na, songon parbueni angka na taula. Antong! Tangihon hamu ma hata ni Debata na mandok: Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan. Antong taharinggashon ma manghobasi huriaNa dibagasan dame, sada ni roha dohot holong ni roha. Songon thema ni Pesta Gotilon sadarion: “Habibinsar ni mata ni ari hasintongan dohot hamalumon”.
Jongjong ma hita..
H : (Mangendehon BE 649: 1 “Dipasada Ama i”)
Dipasada Ama i, angka na porsea i,
Ni rahutan ni holong ni Kristus i marhite TondiNa i.
Kristus i tatiru ma, roha tapaserepma,
Taeahi na tau padamehon hita, tu angka dongan i.

20. TANGIANG PANUTUP: PELEAN + AGENDA
21. TANGIANG ALE AMANAMI – PASUPASU

15036722_1593819787593242_2188386548559891485_n15073345_1593832440925310_8818881965600603513_n

Videos :

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s