Jamita Tu 17 Agustus 2014

Bahan Sermon Tu Jamita
Minggu IX Dung Trinitatis, 17 Agustus 2014
Turpuk Jamita : Psalmn 67, 2-8

Patujolo
Ia Psalmn on i ma sada ungkapan hati sian sahalak di tonga ni punguan manang bangso na manghilalahon pasupasu dohot asi ni roha ni Debata di bagasan ngolu songon bangso ni Debata.
Torop do angka pande mandok, di bagasan Psalmn 67 on tarida do sada konteks taringot tu ngolu ni bangso i dung ruar sian habuangan. Sian angka pandohan “Pasupasu ni Debata”, “Gogo ni tano” [bahasa Indonesia : tanah memberi hasil= masa gotilon] dohot “sogot” i ma taringot tu partingkian na naeng ro, tarida ma pangantusion ni parpsalmn mamparhatopot di tingkina gabe ditanda angka bangso di tano on Debata Jahowa. Ala ni i boi do Psalmn on marrumang ende pujipujian ala pambahenan ni Debata di tingki na salpu, alai laos boi do manudu tu tingki sinuaeng suang songon panghirimon tu tingki na ro.

Hatorangan ni Turpuk :
Ayat 2 :
Dibuhai do Psalm 67 on marhite rumusan manang formula na marharoroan sian pasupasu na pinasahat ni malim songon na jumpang hita di 4 Musa 6, 24-26 i. Didok do di ayat on „Sai asi ma rohaM di hami, jala pasupasu hami, sai marsinondang ma bohiM mandongani hami..” Mansai donok do i tu pasupasu na pinasahat ni malim di bagas joro. Tutu molo pasupasu hamalimon i, dipasahat sahalak malim tu punguan na ro di bagas joro; alai anggo na nidok ni parpsalmn on sai tarida do hira dipasahat sahalak sian natorop i, jala tu tongatonganasida.

Ia pandohan on patuduhon songon bangso ni Debata nasida ndang hea sahat pasupasu i holan tu marsasahalak, alai ingkon idaon do i songon pasupasu ni Debata nang tu punguan i manang secara kolektif.
Jala songon na taida di prinsip ni pangidoan i, dipasahat parpsalmn do tangiang on marhite ungkapan bersama, jala i do na taida di prinsip hatopan ni tangiang songon na pinodahon ni Tuhan Jesus tu angka sisean-Na di Mateus 6 i, i ma “Tangiang Ale Amanami”. Molo taida di tangiang i, nasa pangidoan dipasahat do songon pangidoannami, ndang pangidoanhu.

Ayat 3 : Di ayat on jumpang hita ma aha do tujuan dipasahat Debata pasupasuNa tu tano on. I ma asa “lam marbinoto tano on di dalanMu, diboto sude angka bangso sudena”. “Tano” dison boi do marlapatan songon huta/ negeri manang tano na parmianan ni angka bangso dohot marga [ayat 3a +5d]; alai di ayat 7a “tano” martudutudu tu tano songon na manubuhon angka suansuanan, i ma tanah pertanian wadah ni bercocok tanam.

Ayat 4+6 :
Didok sahalak penafsir sasintongna mangihuthon struktur na somal di Psalmn manang syair ni halak Jahudi adong do sada bagian na mago dison. Ingkon adong do sahalinari pandohan songon na jumpang di ayat 4 dohot 6 on. Jadi ingkon adong tolu hali, i ma di bagian pangujungi ni Psalmn on. Alai ndang jumpangnta i.
Sai hira sada alus do on tu pandohan na pinasahat ni sahalak di tongatonga nasida. Jadi ende manang tangiang pamujion on dihatahon nasida sai hira masialusan [responsoria].

Roha na marlas ni roha jala marolopolop dison i ma patuduhon sada hamauliateon ni roha. Ajakan laho mamuji dohot pasangap Debata i ma na tarida sian parpsalmn dison. Asa sude bangso mamuji jala marolopolop ala pambahen ni Debata.

Ayat 7:
Dung dipasahat parpsalm pandohan pujian di ginjang, nuaeng diulahi ma muse i sai songon sada pangondolhonon ni pujipujian nasida. Tano na didok dison martudutudu do i tu tano ro di nasa na isina. Boi do on marhadomuan tu panompaon ni Debata dimulana di langit dohot tano on, ro di nasa na tinompa. Tano na tapaidaida rotak jala kotor, alai laos disi do tubu angka suansuanan jala mangalehon parbuena. Dohot do nang angka i patuduhon hamuliaon ni Debata ala Ibana mamasumasu.

Deba Ondolan di Jamita
1. Debata parholong ni roha do Debata ni halak Kristen i. Jala ndada holan tu sasapunguan hasahatanna, alai lomo do rohaNa asa sahat pasupasu i tu nasa bangso jala “sahat tu ujung ni tano on”.
Jumpang hita do manang na piga hali pandohan on “Asa sude bangso mamuji Ibana” [ayat 4 dohot ayat 6]. Di hata Indonesia didok “Kiranya bangsa-bangsa semuanya bersyukur kepada-Mu ya Allah.. ”.

Tontu halak na tau mandok mauliate, i do dihalomohon Debata. Sahalak na tau mambilang pasupasu ni Debata jala marroha mauliate [1 Tessalonik 5, 18], gabe hiras ma rohana mangula ulaon dohot marpanghirimon.

Tontu molo tapujipuji Debata, ndang na hurangan Debata ni hasangapon dohot hamuliaon. Jala ndang dung hea adong tangiang manang pamujion sian jolma i asa gabe singkop hamuliaon ni Debata. Alai lomo roha-Na asa sude bangso mamoto haluaon na pinatupa-Na jala sude marga [suku bangsa] mamuji Ibana. Didok di 1 Timoteus 2, 4 “Ai dipangido rohaNa do naeng saluhut jolma malua jala sahat mananda hasintongan i”.

2. Ia partingkian on ombas na pinasahat ni Debata tu bangso-Na saleleng mangolu di tano on. Taida ma dison tubu sada kesadaran di parpsalmn on paboa Debata di ginjang ni saluhut partingkian i, na melampaui sude tingki dohot masa, jala Ibana do tahe mangelehon partingkian i.

Ia ngolu ni halak Kristen di tano on i ma sada tingki parasian. Saleleng mardalan hita di tano on, taboto do adong do ujung ni hasiangan on. Adong do ajal ni hasiangan on, disi ma ro Kristus paduahalihon songon panguhum na sintong.
Ibana do mangatasi sejarah dohot partingkian na tatanda on, di bagasan ni i do hita mangolu. Asa pardalanan sejarah didok ma i history. Hata “history” sasintongna patuduhon “His story”, berita tentang Dia i ma barita manang sejarah taringot tu Tuhan Debata do i.

3. Songon bagian na so tarsirang sian NKRI, sude do ruas ni HKBP manghalashon dohot manghamauliatehon tu Debata siala pasupasu-Na na mamboan haluaon manang kemerdekaan tu bangso on 69 taon na salpu. Tung silehonlehon ni Debata do haluaon tu bangso on, asa taparhaseang marhite partisipasi dohot panumpahionnta.

Tahalashon do nang partisipasi ni ruas ni huria i di ngolu berbangsa dan bernegara di Indonesia on. Suang songon i ma nian joujou ni turpuk on asa sude hita parsidohot di pembangunan ni bangsonta, asa diboto habalgaon dohot asi ni roha ni Debata marhite ngolu dohot parangenta. Manungguli rohanta do pesta kemerdekaan ni bangso on mamereng peran dohot parsidohotonnta di semangat kolektifitas ni bangsonta Indonesia, jala asa boi hita songon angka na porsea gabe sira dohot panondang ni tano on [Mateus 5, 13+16].

Amen.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s