Jamita Tu Minggu Ujung Taon Parhuriaon, 25 Nopember 2012

Turpuk : Daniel 7 : 9-10 + 13-14

“Pangungkapon Taringot Tu Ari Uhum Sogot”

1. Sahat ma hita nuaeng tu sada ujung taon di parhuriaonta. Jala di bagasan tingki on dipatupa do parningotan di angka na monding sian tongatonganta. Laho paingothon hita do i, asa taingot na monding do hita muse. Marhite i ma asa tapangke ngolunta on sadenggandengganna laho manghaporseai Tuhan Jesus, asa masuk hita tu hangoluan salelenglelengna i, i ma di pamarentaon-Na.

2. Di pangungkapon na tu si Daniel, taida ma Debata do na parjolo. Ibana do “na so suda arina” i (ayat 9) i ma patuduhon Debata Ama i. Ibana do Debata salelenglelengna (Psalm 90:2; Jes. 43:10). Jala marloksaloksa, tung so habilangan angka na marsomba jala marhaladoi di Ibana (ayat 10). Dipapatar do Ibana tu hita, nang pe so targombarhon hita sasintongna manang ndang boi taida tompaNa. Ia paheanna saksak do songon itak – pakaian-Nya putih seperti salju dan rambut-Nya bersih seperti bulu domba. Saksak, jala tung ias, tung tiur jala patiurhu laho idaonta. Sude na i patuduhon na tung badia jala songkal Debatanta i. Ibana na badia jala na so dung sala, mangatasi sude angka gombaran dohot pangantusion.
Digombarhon do “obuk ni uluna songon hapas na binusur”, dalam hal on laho patuduhon habisukonna. Ibana na bisuk situtu di bagasan pangarajaionna. Jala habangsana i songon jillamjillam ni api! I ma hataridaan huaso dohot hamuliaon di harajaonna patupa panguhumion (Psalm 96:13). Tontu angka gombaran na binahenna dison patuduhon huaso ni Debata jala pangarajaionna na mangatasi sude angka huaso dohot harajaon.

3. Dilehon Debata do pangungkapon on tu si Daniel, laho patoguhon roha ni bangso Israel na tongon mangadopi parungkilon ala habuangan di Babel. Laho mangapoi rohanasida, jala joujou asa tongtong nasida marningot di pambahenan ni Debata, i do umbahen dipasahat. Tutu, ala habuangan i gabe holsoan jala mabiar situtu do nasida taringot tu masa depan nasida sandiri di toru ni panggomgomion ni si Belsasar hatiha i. Sai hira i ma ujung ni ngolu nasida dihilala, songon pribadi nang songon sada bangso.
Di bindu 7 dipaboa do adong opat binatang, i ma gombaran ni angka harajaon : 1) Singa jala na marhabong rajauali (ay. 4) – i ma Babel, na nirajaan ni Nebukadnesar (Jer. 49:22; Hes. 17:3); 2) gompul (ay. 5) – ima gombaran ni Persia; 3) Babiat (ay. 6) – i ma harajaon Junani ditoru ni Alexander Agung. Jala opat uluna manggombarhon gabe bola opat harajaon i dung mate si Aleksander i ma Makedonia, Asia na metmet, Syria dohot Misir (Dan. 8:8); 4) na paopathon sada binatang na mansai jorbut manggombarhon kekaisaran Romawi. Angka i ma harajaon na bangkit, na marhuaso situtu jala naeng mangago bangso ni Debata.
Alai nang pe songon dia gogo dohot habungaran ni angka harajaon di portibi on, ingkon taluhonon ni harajaon ni Debata do sude di ujungna.

4. Alai adong ma sada harajaon, i ma na niida ni si Daniel di pangungkapon borngin, sahalak marhite ombun di langit, i ma “anak ni jolma” i. Ise do “anak ni jolma” na nidokna dison? Satolop do angka ahli istilah “anak ni jolma” dison martudutudu tu Mesias, i ma na miniahan (Dan. 9:25-26) i ma Jesus Kristus. Jala nang angka Injil muse idaonta hurang lobi 80 hali dipangke istilah “Anak ni jolma”, jala dipangke Jesus do i manudu tu diriNa sandiri (Mat. 24:30; 26:64).
Ibana do na ro marhitehite ombun di langit i (Mat. 24:30; Mark. 13:26; 14:26; Pangk. 1:7, 13; 14:14). Ibana na manjalo harajaon sian “na so suda arina”, jala dibasabasahon tu ibana harajaon i.
Jadi ibana songon anak ni jolma i, i ma Jesus na bangkit mamarenta harajaon i sahat tu ujungna. Ibana do manean harajaon i, jala sude ia na nirajaanna ro sian sude bangso dohot parhataan, jala i do harajaon na manongtong. Ibana ma manguhumi nasa na adong. Dungi dibunu jala dipapidom ibana ma sude binatang i. Ai Ibana do sahat nasa huaso di banua ginjang dohot di tano on (Mat. 28:18; Joh. 3:35; 1 Kor. 15:27), jala Ibana marhuaso tu sude jolma di tano on (Psalmn 72:11; Pil. 2:9-11) jala harajaon saleleng lelengna (Mika 4:7; Luk. 1:33; Heber 12;28).

5. Angka gombaran na pinatorang na dison paboahon tu hita manang na piga hal – jala angka i ma na mangapuli jala margogoihon hita di bagasan angka sitaonon dohot parungkilon.
Parjolo, Ala harajaon jala pamarentaon saleleng lelengna do harajaon-Na i , gabe na manongtong do nang hita na mian di bagasan i saleleng lelengna. Marlapatan do i paboa hangoluan na manongtong ndada holan di sijalahanta i, ai nunga diparade jala nunga dohot hita marnampunahonsa. Jala i do sude na nidokna di Bibel i taringot tu panghirimon. Tutu ndang dope hita mangalami i rimpas, alai nunga sahat tu hita, i ma marhite huaso ni pandidion na badia, jala silehonlehon na tu hita marhite ulaon na badia. I do asa didok, “Na porsea jala tardidi dapotan haluaon..” (Mark. 16:15).

On ma haluaonta dohot panghirimonta. Panguhuman songon na taida nunga masa i, songon taida di bagasan turpuk on. Di angka ari i ma hita diuhumi marhite angka na niulana – jala uhumonna. Ala ni i, ndada tu joloan ni ari on. Alai nunga dipapatar i marhite silang ni Tuhanta i. Ala ni silang ni Jesus – Anak ni Jolma i – i do na pasonang hita huhut gabe panghirimonta, jala i ma mambahen hita marhinsa ni roha paboa Ibana manjou hita mian di bagasan haporseaon tu Ibana.

Paduahon, Angka pangungkapon i paboahon tu hita bahwa sude portibi on gabe dipauba di bagasan Jesus Kristus. Ia pangungkapon na pinaboa na dison i ma taringot tu angka ari na parpudi. Jesus ndada holan di parsitongaan ni barita i alai ibana do na nidok ni angka sejarah i. Lapatanna, hagogok ni ngolunta on ingkon tu Ibana do, jala marpamusatan tu Ibana do i.
Dipatuduhon Debata do holong ni rohaNa, jala panarihononNa tu bangsona sepanjang sejarah ni portibi on, nang tu hita ganup marhitehite angka pengalaman na itabolus ganup ari.

Alai ringkot do idaonta paima ari panguhuman i, sai hira na dilehon do kesempatan manang ngolu tu binatang na nidokna disi. Dilehon do “tingki” manang “kesempatan” na tinontuhon paima ari panguhuman na parpudi.
Boi ma dohonon paboa na sai tubu do angka huaso dohot angka hagogoon di portibi on mangela roha dohot haporseaonta tu Tuhanta. On ma gombaran ni parporangan torus manorus mangalo angka harajaon dohot huaso ni sibolis, mamungka sian silang ni Kristus i sahat tu ari panguhuman na parpudi.

Patoluhon, Ia pamarentaon ni Anak ni Jolma i dipungka di bagasan silang i. Angka na masa sinuaeng on ndang jadi manguba i. Ala ni do sala molo tapingkiri ia angka na taalami mambahen gabe asing hajongjonganta di adopan ni Debata, ala “harajaon saleleng lelengna do harajaonna, jala na so tupa salpu jala na so jadi pesan harajaonna i”. Manang boha pe panghilalaanta manang parsorionta, nunga dipaboa Ibana panggomgomionna na manongtong jala sangkapNa paluahon hita.

Panatapan on ujungna paboahon tu hita na ingkon teanhononNa lehononna ma harajaon i tu Ibana. Ngolu na marsingkor. Bahaya tongtong mengancam. Sahit mabibiari hita. Jotjot do hita mangalami frustrasi, bingung, ganggu dohot panghilalan na asing. Alai Debata sandiri paboahon tu hita asa unang paposhu rohanta di panghilalaanta sandiri, alai asa tatangihon ma hata-Na. Tibu 5 abad andorang Kristus dipaboa pangungkapon on tu si Daniel, jala singkop ma i di bagasan Kristus sahat tu ajal ni hasiangan on. Lomo ni rohana, asa unang ganggu hita di hasesaan ni dosa na pinatupa na, dohot di haluaon na pinaradena tu angka na porsea. Alai asa pos situtu rohanta di haluaon marhite hamamate ni Tuhan Jesus di hau pinarsilang i.

Botima ..

Baca PDF Sermon 25 Nopember 2012 di sini 160.5kB

Serial ebook for samsung GT-P1000 (400X670) pixels better on samsung 7`- 600X1024 pixels

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s