I do ate..?!

Sai songon hata leseng do binege hata on, alus ni hataniba rupani ate. “I do ate..?!” ninna dongan rupani mengomentari hata manang hatorangan sian iba. Olo do tubu jut ni roha sipota disi, ai beha ma tung denggan nipatorang jala sian bulus ni roha hape gabe hata mehet songon i ma na ro.
Alai bah sahali on, sian roha na bulus ruar anggo hata on ala binege hatorangan ni dongan. Molo naeng manuhor sipeda ham, suan ma kopi ateng 20 rante, alai anggo naeng manuhor kareta (maksudna sepeda motor) ba suan ma 2 rante! Bah, maol ninna roha siat tu pingkiran pandohan ni angka naung pensiun on ate, ala memang angka amanta naung suda gogo do sian angka ulaonna mandok hata i. Boasa ulaning gabe balik, ninna roha. Manuhor kareta boi 2 rante, hape anggo 20 rante holan lereng.
Hape naung tangkas do diboto nasida, ala memang “ulaon tu si malas” do ninna manuan dohot patureture kopi ateng on, asa sossok ma i tu angka na pensiun songon iba ninna amanta i muse. Ala memang ndang apala songon panghudus ni ulaon marjuma manang marhauma, na porlu hatop sidung bogas niba jala ringkot tenaga mangombak balik. Na porlu dison i ma nunut, nunut paiashon, manggotap angka ranting liar, dohot lumobi ma mamutiki angka boras na muse. Tung ingkon urus do. Ala ni i do, ndang ala bidangna, alai rawatna do. Tupa molo adong 20 rante nunga sahektar i, ba manang beha pe nunga songon na losok roha paiashon ala ni bidangna, jala ndang apala sarupa be perhatian tu molo holan 2 rante sambing. Olo ma tutu iba sadari holan mambaboi dohot paiashon bona ni kopi i. nitapu ma mulai manogot sampe holom holan saember sambing do dapotniba. Ala memang ingkon tung manat do, unang masuak nang pamutihan i, ai olo do laos ro muse sian i borasna. Ue amang, .. ninna na deba. Molo nunga apala antar bidang, sipota gabe dibuat nampunasa ma angka parkarejo, digaji ma mambuat hasil ni kopi ateng i. sian 4 rante kopi ateng na urus, boi do ruar sahali saminggu 2 kaleng, setara ma Rp. 200 ribu, bersih. Lapatanna, nunga haruar manggarar upa ni angka pamutik. Bah, ndang siulaon i ninna angka amanta tutu. Jadi mulak ma nasida, paiashon kopi atengna be. Anggiat na saotik i gabe pasupasu tu nasida, unang ma jolo tutu naeng manuhor supra fit; tung holan keperluan rumatangga nunga malua be molo diusung nasida nuaeng 2 kaleng kopi ateng tu pokan na di Sidamanik ganup ari jumahatna.
I do antong..!?

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s