NAMARBAJU PARJAMITA

Sian : M. Pitara S.

Diparbalohan na tu Padang Daret, adong do sada luat na polin pangisina holan parugamo Islam. Angka paradongan do pangisi ni luat i ala parkobun karet be do nasida. Sai ro do na ginoaranna angka paralongalong sian ganup inganan na humaliang tu luat i, lao palangku tiga2na, jala sude do i langku hinorhon ni jimok ni pangomoan di luat i. Holan sahalak ma laok nasida parugamo Kristen, i ma anggota ni Huria Menonit, sahalak na marbaju boru Nasution, na ditempatkan jadi guru SD Negeri di luat i.

Adong do dua ama2 paralongalong sian Padangsidempuan jala parugamo Kristen, na sai ro tu luat i mamboan tiga2na, sahalak sian na dua i nunga marpahompu, jala na sadanai nunga 8 urang. Paidaida uli ni rupa ni angka boru2 dohot hamoraon na adong di luat i, sian hadal ni roha ni ama2 na dua i, gabe ditopot nasida ma namarbaju ni luat i gabe ripena na paduahon, Dioloi angka na marbaju i do antong, jala dinikahon kadhi ni luat i ma nasida jala gabe agama Islam, ala naung gabe ama2 na so tarpinsang nasida.
Nang pe, naung paturanggang sisumuti ni ama2 na dua i,dapot nasida namarbaju enter2. Ala mangihuthon ruhut ni agama Islam, molo boi ditait nasida sian halak Kristen gabe Islam, mansai balga situtu do PAHALANA jala di langit papituhon ma inganan na molo dung suda bohalna. Asa na pasauthon tohonanna do na marbaju na dua halak i, ndang na mangadu rupa manang sinadongan. Tung manangkas NAMARBAJU PARJAMITA do nasida, jala sahat tu na sumeahon angkulana lao mangoloi rukun agama Islam.
Dung dinikahon ama2 na dud i antong, pintor so didulo be keluargana nang angka ianangkonna nunga dilalapi ripena naumposo i nasida na dua. Jala molo adong na pajumpang na tinandana to ama2 na dua i, sai ditabunihon do huta na niingananna, manjaga sotung ro inanta na parjolo dohot angka ianangkonna mangalapi nasida. Alai tangkas do diboto keluargana be, na mangolu do ama2 na dua i.

Sai dipaberengbereng namarbaju guru SD parugamo Kristen i do ama2 na dua i. Pintor diranap rohana do ingkon parugamo Kristen ama2 na dua i, jala naung madabu tu tirangkap ni uti2an. Ai aut parugamo Islam ama2 na dua i, ndang tagamon olo namarbaju na dua i tu nasida, agia pe manang beha hamoraon ni ama2 na dua i. Lao do mangaranap roha ni namarbaju guru i dompak keluarga ni ama2 na dua i na sai maheu ditingki i dibagasna be jala marmata siteuhon angka inakhonna paima ima haroro amana. Sai ditangiangkon ma ama na dua i, asa mohe rohana mulak tu na tama, asa didapothon keluargana na parjolo.

Dung manang naung sadia leleng ditangiangkon namarbaju guru ondeng ama2 na dua i, disengaja ma muse mandapothon nasida ditongandalan. Diuduti ma nang pangkataionna didok ma : “Halak tingon utara do hamunu? na aha do margamunu?” Dung dialusi ama2 na dua i sungkun2 ondeng, laos ditonahon namarbaju guru i ma ama2 na dua i, asa olo ro jolo tu bagasna. Jala dung ro ama2 na dua i tu bagas ni namarbaju guru i, disungkun ma ugamo ni ama2 na dua i najolo. Dialusi ama2 nadua i ma na ruas ni HKBP do ma2 i di Padangsidempuan. Huhut laos dipaboa ma raksa ni parngoluonna dohot raksa ni keluargana.
Di paboa namarbaju guru i ma na parugamo Kristen do nang ibana jala marsikola najolo di SGB Padangsidempuan. Dipaingot ma jolo amanta na dua i, dipahehe ma roha nasida asa mulak marningot tu dongan saripena, dohot angka ianakhonna tarlumobi anak hasianna na sai jalak2 jumalahi amana. Dung diida na marpangkorhon do sipaingot i tu ama2 na dua i, diuduti ma muse manungguli poda na sian Tuhan i. Sai tarhatotong ma ama2 na dua i umbege jamita ni namarbaju guru i jala huhut sai martektehan be iluna. Diboan namarbaju guru i ma muse ama2 na dua i ditingki i ditangiangna; ditangiangkon do nang keluarga ni ama2 i, na sai maheu nuaeng di inganan na be jala diuduti ma dohot ende i :

Ndada he patut hutangihon,
Muda dipio Jesus au.
Patut situtu huihuthon,
Jana na mangoloi au.
Madung tarsurat do patikna,
Di gorak ni taroktokki.
Humolong ma rohangku mida
Jahowa na di surgo i
; d.u.

Siar ma tu roha ni ama2 na dua i HATIURON i, targorak be ma nang rohana be laos ditingki i martangiang lao pasesahon dosana be tu Tuhanna na parjolo, i ma Jesus Kristus. Laos dipangido ma asa rap marende nasida dihata Toba ; Sai mulak, sai mulak ho na lao jalang i; d. u .. huhut sosombopon nasida mangendehon, ai nunga pogo tu roha ni ama2 na dua i, poda na marsahala i.
Talu ma nuaeng NAMARBAJU PARJAMITA sian parugamo Islam, nang pe dohot angkulana dipelehon dibahen NAMARBAJU PARJAMITA ni Kristus, ala mudar ni Jesus dibahen modalna. Jala pintor mulak ma marsogotna i ama2 na dua i mandapothon dongan saripena dohot ianakhonna tu Padangsidempuan dibagasan olopolop, ai nunga malua nasida sian tirangkap ni hamagoan.

Marragam do nuaeng angka tohonan ni namarbaju di tonga2 ni HKBP. Aut haidaan be ma nian angka ulaon na nalnal dipatupa nasida. Asa marhillong huria i dipamerengan ni parugamo na asing mambahen sangap nang NAMPUNA HURIA i, pangkorhonna. Sai unang ma ngongong2 diharbangan ni hariburon lao paimaima ama2 parsisumut na paturanggang, lao manogihon nasida tu bagasan hariburon ni portibi, ala so torang be diida mudar ni Jesus na mabaor humophop nasida.

SP Immanuel Juni 1974 No.10, al. 28-9

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s