“Sahat tu dia do hita dibereng Tuhan Jesus dohot diantoi?”

Dung sahat amanta i tu gareja hundul ma ibana denggan. Tongkinnari hundul ma Jesus dilambungna i. Dung i didok Tuhan i ma : “Tuani ma ro ho amang manangihon hatangKi, anggiat ma gabe dihangoluhon ho. Olo tutu Tuhan tung mansai las do rohangku rap dohot Ho di gareja on ninna amanta i, huhut dilompit tanganna ai nunga mangkuling giring2 pamasukhon.
Di na mar-epistel sintua i didok Jesus ma tu amanta i. Boasa tu tiga2mi laho mampar roham amang? Oh, .. oh , .. tahe huparrohahon pe hatami muse Tuhan ninna amanta i.

Boasa mampar roham muse amang, ninna Jesus muse. Uju marjamita pandita i. Oh,.. oh, tahe hupahibul pe rohangku Tuhan ninna amanta i muse mangalusi. Di na laho ruar sian gareja didok Jesus ma muse tu amanta i, i ma amang parrohahon. Sude hatangki ai i do hangoluanmu; Olo Tuhan ninna amanta laho mulak tu huta.

Di na sahat amanta i tu jabu, dipangido ma tu inanta i asa mangan ibana. Hape, nunga suda indahan dipangan anakkonna. Marpiar2 ma muruk ni amanta i, dipastaphon ma inanta i jala dipambolahon ma piring dohot mangkuk. Hape . . . tompu ma adong na manuktuk : “Ise i?,” ninna amanta i gogo. Ahu do i ninna sian duru, mangalusi. Masuk, ninna amanta i koras. Hape tarsonggot ma amanta i, ai diida Jesus jongjong muse di jolona. Ba,.. ba., Ho do hape i Tuhan? Olo, Ahu do i, na hubege do soara ni pastap2 dohot piring na marbolaan umbahen na ro Ahu ninna Jesus mangalusi.
“I ma da Tuhan, ise ma so muruk nunga male iba hape indahan so adong. Tung Ho ma jolo Tuhan””. I ma da, alus na lambok paombun rimas. alai anggo hata na koras, mambahen marsijongjong ateate, ninna Jesus.
Laos ninna Jesus ma muse : “Taluhon ma sibolis i marhite halambohon ni roha”. Olo Tuhan, sai pargogoi ma ahu, dung i laho ma Jesus. Hundul ma amanta i marhuhusari. Boasa pola tung ro Jesus i nangkin, “Nda nunga sae holan di gareja nian radotanna iba? Hape dohot soal rumah tangga laos diantoi?”
Ari Selasa na i laho ma amanta i mamboan tiga2na tu onan. Hundul ma ibana di balerong i paimaima angka panuhor, jala tompu ma dibereng ibana ro sada halak tu partigatigaanna i. On ma amang, dumenggan do on sian nampuna ni halak an, so hea tabuat barang na so hasea. Tetoron on ma amang? Wool England pe adong do huhut di patudutudu amanta i sude ragam ni abitna i. Sadia ma on amang sasitel, ninna panuhor i huhut di jama keper putih. Oh, i ma di hamu? Denggan do on tutu, Na so hurang ma i Rp 7.500 ninna amanta i. Ndang boi oruanmu? ninna panuhor i. Sai ripas nda gari pokok ni nunga Rp. 7.400- huhut di nolnol panuhor i. Pajumpa ma simalolongnasida, tarsonggot ma amanta i, ai Jesus do hape na jongjong di jolona i. “Boasa ro Ho tuson Tuhan? Anggo ulaon songon on ndang apala denggan nian dohot antoanMu.” Olo amang, ninna Jesus, di sude ngolum do antoanku ho. Ai naung mate do Ahu humophop ho. Dung i laho ma Jesus sian i. Alai anggo amanta i sai martutungkian ma, di sude ngolungku do hape diantoi Jesus Tuhanki. Olat ni on hupasahat ma tu Ibana nasa siulaonku, ninna amanta i di bagasan rohana huhut martangiang.

Batu IV SLT
SP Immanuel no.4, Maret 1974, al. 19-20

Advertisements

One comment

  1. Pingback: Free Piano

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s