DITAONHON

(Untuk adik-adik yang belum pernah, atau jarang berkunjung ke Bona Pasogit)

Ale dongan Panjaha na pinarsangapan !
Adong do manang piga lapatan ni hata songon na nidok di judul ni sitaringotan on, ditaonhon.
Deba sian i :
=Ditaonhon= marlapatan “dihabengethon”, isara ni halak na sai ganup tongkin ditipa sitaonon, parsahiton, angka na hansit, alai mangkirim tongtong dihalumbangon. Sada do na tiniop ni rohana : Sai na marujung do sude na hansit on! Ndang mandele, ndang marungut-ungut; ai gomos dihirim rohana : Na apul-apul do jaloonna, na songon parbue ni habengetonna. Aha pe na hansit, na posi ro tu ngoluna = ditaonhon.
=Ditaonhon = marlapatan “diporsan” sude, na ampe tu abarana saonari, laho mangomohon parbue ni hajolmaonna muse; isara ni parhauma i, manaon renge ni ulaon, ditinggang udan, didadang las ni ari. Na dao dope ditatap rohana gotilon halalas ni roha, na pasti jumpang, laho mangubati sude na nidangolna nasailaon.
=Ditaonhon= marlapatan, “dihasabamhon” sude hahurangan, na mangorui na patut parjambarhononhon hian nian. Isara ni, angka natoras (orang-orang tua) pasingkolahon gellengna; marholit tu dirina, asa tuk bahenonna manggohi na ringkot tu ianakkonna i. Ditaonhon “manggugut sira” didok, dohot “marabit basan”.
=Ditaonhon = marlapatan “dijalo” sude hata-hata, tiha-tiha, rehe-rehe, sarita sian dongan saparsaoran dongan saulaon, dongan sahaporseaon, atik pe alo situtu tu rohana. Ndang pola dialusi, ndang dibalosi i. Ai didok do di rohana, jujur mula ni bada, bolus bona ni pardamean (umpama Batak). Tarlobi di ha-Kristenon, “ .. saluhut do ditanom rohana ………. jala ditaon”.

Adong dope tupa debanari pangalapathonon tu na denggan sian hata “ditaonhon” na tataringoti i; tau sitiruon di ngolunta on.
Alai adong do sada pangalapathonon na asing di hata “ditaonhon” on, na so ture, na so sitiruon. Parrohahon ma barita on :
Adong ma sada huta na suhi, di na lingling, dao sian dalan balobung. Na gonting do huta i, marparik na timbo humaliang. Holan sada do harbangan, na songon pintu masuk tu, dohot haruar sian huta i. Mandapothon harbangan i, boluson do sada hite diatas bondar na tar bagas. Na pinajadi sian batang ni bagot do hite i; dipadomu tolu lobong. Atik pe mansai sosot dirahut peak na tolu i, sai adong do lubang-lubang na metmet di parholanganna i.
Na ro do sahali, borngin-borngin, sahalak parjahat masuk tu huta i, naeng manangko anak ni babi pahan-pahanan ni parhuta i. Alai di na manisipi ibana naeng manangkup sisoroonna, tompu ma marlungussss ina ni pinahan i, gabe tarboto tu nampunasa, dung i digorahon ma panangko…. panangko!!!
Mijur be ma angka baoa parhuta i tu alaman, jala adong ma na sigop pintor laho tu bahal, torus tu balian. Nunga sanga martaronggop panangko i tu toru ni hite-hite na nidok nangkin. Atik pe mansai bidang haholomon partabunianna, tung mansai gogot do anggo inganan partaronggopanna i; ai holan humusor ibana otik, pintor tarboto ma tu na mangalelei ibana; jadi sai ngongong ma ibana disi. Nunga pola salpu deba parhuta i tu bariba ni hite i mangalului ibana; jadi sai ngongong ma ibana disi songon na, hinapit. Alai adong ma jolma sahalak sian na mangalelei ibana, so satongkin, di ginjangna, laho buang air kecil (santabi); hona siram na ibana di toru … ditaonhon …, sadia godang ro sian ginjang manonui ibana … ditaonhon; ndang manggulmit, sotung tarboto na disi ibana martaronggop.
Adong muse sahalak nari, tompu mamulos siubeonna dihilala, gabe dipadenggan panjurgangna dompak lubang, holang-holang ni bagot hite-hite i, dungi dipalua ma narotakna (santabi); tung toho sangkan tu panangko i. Ditaonhon …. ditaonhon …. ditaonhon jolo. Alai tompu ma moakoak ibana, gabe tarbege tu silului ibana; tardapot ma … gabe hona tangkup di ujungna.
Ale dongan, ianggo hata “ditaonhon” na dison, tung na so ture do i. Ai ala ni aha umbahen na songon i??? Tung nialap ni hajahatonna do !!!
Tupa do adong halak na jahat, padugu-dugu angka halak na marale-ale asa marbada, na marsahuta asa marbolat, na saulaon asa patetul. Maronding-onding dipudi ni na sabariba, marhusipi, pajuju-juju na sabariba nari asa marbada (lempar batu sembunyi tangan). Alai manang na beha pe malona, anggo ujung ni i, sai na tardapot do i muse, atik pe naung ditaonhon, sai ditaonhon mamonduti hosa flatus ni paronding-ondinganna, manang tijur ni na sian bariba an. Moak-oak ma ibana, gabe tarboto ma. Ah, dao ma na so ture ! Beha, muse molo mamoto ma paronding-ondingan i : “ …. naung ditadingkon do hape ale-alena, naung ale-ale ni amana hian”, ala ni husip-husip ni na dipudina i? Beha muse ma “sipangkusipi” i, molo mamoto ma na hinusipanna, “ … na tanda ni haburjuon do bugang angka na binahen ni ale-ale, jala na marjehe-jehe do “umma-umma ni pangasungi i?” (Poda 27).
Sai na denggan i ma tapareahi antong.

**
Pematang Siantar, Juli 1978- RWN
Sp Imm No 14/ Agustus 1978; p.599-60

Advertisements

One comment

  1. Pingback: Free Piano

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s