“SAE MA I, LIMPER I !”

Nunga simpul be mangan parpesta i. Mardalan ma angka na manaruhon tumpak. Sai dipanotnoti Ama ni Mei do Panjalangon i. “On dope hea marulaon alealengkon”, marhatahata ibana di bagasan rohana. Huhut dipamanat ibana sambong naung tedek di jolo ni hasuhuton bolon i. Pardosdosan nama antong idaon anggo silimaratus i. “Salpu angka pamilina, hami angka alealena nama”, didadap huhut sangkuketena. Didadap muse sangku jolo, lam leleng lam hojot pandadapna i, sangku jolo sangku pudi, sangku parginjang sangku partoru; langan idaon bohi na. “Bah, tinggal !” sompong soara i tarbege.
“Aha i ?” ninna na di lambungna i. “Ah nga putus on! Pinjam jo parsaribuanmi !”
“Daga, ndang marhepeng muse ahu Lae !”
“Parlimaratusan i pe taho ! Tolong ma jo ba ! Annon pe di huta…” “Na so adong do !”
Sai didiori tu angka jolma natorop i huhut marhusiphusip. Alai ndang adong na boi panginjaman. Tole nunga sahat ne tu aleale asa maju tu jolo laho manjalang. “Boha nama on ?” ninna rohana lam angka dotdot. Lam hir hodok i. Sahali nari didadapi sangkuna. Solot sada logam di suhisuhi ni sangkukete i. “Huh !” marhosa ganjang ibana. Songon na mulak tondi tu ruma. “Limper !” ninna ibana mamereng logam na da¬pot i. “Ah, ba paling songon tumpak ni inanta na mabalu na nidok ni jamita i nuaeng nirajuman. Tung rimis nuaeng on dietong ibana asal ma na sian ias ni rohangku. Tung na so ala ni toishu do i”. Gabe dihabaranihon ma maju tu jolo.
Denggan ma ibana mardalan songon halak na mulak gogo. Undukunduk jala hormat antong pardalanna i. Di bagasan las ni roha dijalang ma alealena i. Nanget ma dipeakhon ibana logam silima rupia i tu sambong ni hasuhuton i. “Hah !” ninna natorop na mamida i songgot. Sude marsilonging. Gabe marrara muse bohi ni suhut i, ala ni ila na huroha. Pola moru sangapna dihilala maradophon natorop i. Ai gabe hira sileaan ibana didok rohana. “Aleale aha ma ho ! Tung limper ma tumpakmu ?” Satolop do antong nang roha ni natorop i dipandohan ni suhut i.
Angka hata martubitubi ro tu Ama ni Mei i. Ndang tangkas be ditangihon ibana. Sude i bura do. Ndang tahan be mudama. Hojot nama dilangkahon sian i. Ndang diboto be samban. Lopus hatop so tarbotoboto.
Ndang piga dan sahat ma ibana di jabuna. Sande di karosi. Alai soara ni alealena i torus marsaringar di sipareonna. Pola ditorusi ateatena.
“Toho do tahe”, ninna ibana mulai manghilalahon hata ni alealena i.
“Di dia be masa limper. Ai so adong lapatan ni i. Di ahu pe so marlapatan i. Tung na so marlapatan i ma hape hulehon tumpakhu tu alealengki ? Aha ma salana tong tintinhon nian hulehon laho manumpahi ulaon ni alealengku na burju i. Di tingki harajaon ni dongan sisongon on ma nian naeng tangkas haroroniba. Songon i godang pangurupionna tu ahu. Alai ndang tarsolsolan ahu i tu ibana. Ah tahe, sae ma i limper i ! Tung na so pangkeon be i laho manumpahi angka ulaon na denggan !”
Nunga sahat muse Inanta i, Nai Mei, humalaput mulak sian parpestaan i. Tung marrara muse do bohina idaon ala ni ilana huroha pabegebege hata di parpestaan i.
“Pailahon do ho. Laos limper ma antong dilehon ho tumpakmu Dietong ho do na mangalehon tu dakdanak i, manang songon durungdurung tu Gareja i?”
“Ha ? Gareja?” ninna amantai songgot hohom nasida.
Dung i diulangkon Amanta i ma marsoara na gogo : “Sae ma i, limper i ! Tung na so sipangkeon be i laho manumpahi angka ulaon na denggan manang laho manumpahi angka ulaon di tongatonga ni harajaon ni dongan. Tarlobi muse laho manumpahi angka ulaon ditongatonga harajaon ni Debata!”

TOGAR SIREGAR
Pangaloan.-
SP Imm No 5 Maret 1982; p.40-1

One comment

  1. Pingback: Free Piano

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s