Turiturian na jempek : HOLSO MANGHORHON PANOLSOLION

Di sada huta na metmet adong do maringanan sada keluarga naposo, jala bagasnasida hira na pinjil do sian angka donganna.
Ginoaran keluarga naposo, ale nambura dope parrumatanggaonna, sada dope dibasabasahon Debata dakdanak di nasida marumur sabulan lobi. Di na sahali, uju manogot dope dung borhat amanta i tu ulaonna, tubu do tu roha ni inanta i naeng laho tu batang aek manunsi abit. Alai sai songon na humolso do rohana mamingkiri na so adong dongan ni posoposona i di jabu molo tung tadinghononna. Ai tar dao do batang aek i. Tingki marpingkir inanta on, tompu ma dapot haputusan di rohana, dipapodom ma posoposo i di podoman jala disuru ma biangna na margoar si Gompul laho manjaga anakna i.
Dihurungi ma si Gompul di kamar podoman ni posoposo i, ai haposan jala na mangarti do biang i. Dikunsi ma kamar i sian luar, alai buka do dibahen ianggo jandela. Pos do rohana manadingkon posoposo i jala dibagasan hinsa ni roha do inanta i borhat tu ulaonna. Marende nangetnanget ma inanta i huhut manunsi angka abitna. Endena on do “Holong do roha ni Debatangku, holong rohana tongtong di ahu”, dohot udutna. Sonang idaon rohana laho mulaulaonna i, hira na puas panghilalaanna so ada holsona.
Alai satongkin do las ni rohana i, soluk ma ro holso dohot ganggu ni pingkiran. Ai tompu taroktohon ma ibana, pintor diingot ma posoposona i.
Bah … na beha do ulaning anakhonhi . . . ? Bah …. bah !” ninna rohana. Jala mago ma hinsa ni roha, maradian ma dohot endena.

Naeng tadinghononna ulaonna i asa idaonna posoposo i tu jabu, hape songon na alang, ai holan na paiashon nama nian.
**
Alai tompu ma muse bukbak taroktokna, manambai lomos dohot ganggu ni rohana. Gabe holsoan ma ibana mamingkiri huhut marningot posoposona na dihurungi di jabu dohot biangna si Gompul i.
“Nda tung na kotoran nuaeng anakhi laos diallang si gompul, hape gabe diharathon ibana ?”
Beha nama ahu?” Alai huhudus nama ulaonhon, unang alang”, ninna rohana.
Holso marlaok ganggu, i ma marsorinsorin di rohana. Mago las ni roha  ..maradian nang ende “Holong do roha. …… Pingkiranna, sai laho tu jabu marningot posoposona dohot si gompul.
Hira so dihilala, satonga ias dohot so ias diporoi ma abitna dibahen tu ingananna jala diampehon tu simanjujungna.
Disi dijujung dilangkahon ma tu darat sian aek i huhut sai tongtong holsoan rohana.
Alai disi naeng mulai mardalan inanta i, tompu ma muse tamba holso nang lomosna hira na habang dihilala tondina. Aha na hinolsohon ni rohana, dia na nilomoshonna. Tarbukti ma nuaeng nalnal di simalolongna, ai dibereng ma maringkat jial ro si Gompul mandapothon ibana huhut marngius-ngius diososhon dagingna tu patna.
Mangangguk bingar ma inanta i disi dibereng sap mudar baba ni si Gompul. “Amang… Amangoi amang,
on ma hape alus ni holso ni rohangki, toho do hape lomoshi, nunga diallang si Gompul on anakhi,” ninna anggukna ma gogo songon na rintik sasadasa.
“Husuru ho manjaga hape laos diallang ho anakhonki, on pe ingkon hupusa ma ho biang na so hasea,” ninna, inanta i. Disampathon siboanonna dilului ompongompong laho mamusa si Gompul i. Dapotna ma batu jala dihindat ma laho pamatehon biangna i. Alai sai songon na mangelek do idaon biang i, hira na “minta ampun” marngiusngius, sai diososhon dagingna, tu pat ni inanta i.
Alai ala putus ni roha ni inanta i paingotingot anakhonna i, mago ma asi ni roha sian inanta i, ditompashon ma batu i toho tu ulu ni si Gompul i jala laos mate.
Inanta i pe marlojong ma tu jabu mardongan angguk maramangoi. Dung sahat tu jabu jala masuk tu kamar ni posoposona i, gabe tamba ma anggukna mamereng mudar na marserak disi.
Diida podoman nunga “kacau-balau”, sude suar sair marserahan jala sap mudar, posoposo i ndang adong diida be.
Ndang be da hira so puas be anggukna, huhut dipambalikhon sude tilam ro di bantal na sap mudar i.
Soluk ma ro panolsolion di roha, “Aut huboto songon on ndang tadinghononku anakhi nangkin…, amang tahe dangolna i”, ninna ibana marhatahata huhut diordior di kamar i. Alai di na so hinirim ni rohana, dihindat ma angka bantal, diida ma, disi do modom denggan posoposo i hira na binahen. Dihindat ma huhut dihaol, diummai anakhonna i, ai so pola adong manang mahua posoposo i.
Di na laho haruar inanta i mamboan posoposo i tu kamar tonga, songgot ma rohana tompu mamereng di balik ni pintu i pulguk bangke ni ulok na balga naung marponggolponggol. Na ro do hape ulok i naeng mangallang posoposo i, alai dihalangi jala dialo si Gompul ma ulok i laos dipamate diharati.
“Mudar ni ulok i do hape na di baba ni biang si Gompul na burju i, hape hupusa ibana, amang segana i”, ninna roha ni inanta i manolsoli. Diabing ma posoposo i laos diboan marlojong marnida hapeahan ni si Gompul i.
Mangangguk muse inanta i disi diida tangkas naung mate do hape biang i. Alai beha bahenon so haulahan be, ai so adong roha na marhaposan tu Debata di inanta i, marisuang do endena i na mandok “Holong do roha ni Debatangku”.
Ai aut dipasahat inanta i holso na di rohana i tu Debata, tontu do ndang tarjadi panolsolion, ai saluhutna do boi dipangke Debata songon parhiteanNa laho mangurupi na manjou goarNa.
**
Songon holso ni bangso i di halongonan di na mauas nasida di parhorsihan, disuru Debata do si Musa mangalotakhon tungkotna tu batu gabe haruar aek.
Antong taingot ma hata ni endenta nomor 297, 1 : “Na marsak roham, sai jou Debatam. Na burju, gogo mangurupi”.

St. G. Sipahutar – Lumban Sipahutar – Tarutung.
Sp Immanuel No. 11 Agusts 1982; p. 28-30

Advertisements

7 comments

  1. ise do na ma posting turi-turian on? mauliate ma atas nama keluarga besar sipahutar, gabe sombu sihol, alana nga leleng natua-tua i dung monding, tikki so haru tenar do pe internet.. hape nuaeng adong hu ida tulisan na di blog on… mauliate godang ma alana dang lupa mancantumhon goar ni natua-tua i. mataaaaap….

  2. Denggan do nian turi-turian i, diantusi halak do nian maksud na, alai patanda hu na kinarang sandiri, alana ndang “BATAK” be pangondoshonna.

    molo illustarsi ni parjamita na batak nunga hurang bagas panguhalan ni i, alai nagpe songoni lam tu bisuk na nian angka sintua, jala tipak ma nian tohonan dohot pangkataion, pangalaho nang pambahenan.

    unang songon angka pandita dohot eporus ni HKBP nuaeng holan hepeng do diroha dohot di matana. ua tung di tiru nian pastor atehe, anggo pastor , uskup ndang hea hepeng dipingkiri i, murni do holan pelayanan naung diaturhon sian pusat, ido asa ndang hea marbadai pargareja kaatolik (parsoalan gareja), ala denggan do penatalayanan nasida, ndang songon HKBP-ta naboloni, holan hata penatalayana, hasil na nol besar.

    wahi hamu angka (santabi di angka amanta pandita sii burju roha) mang pandita, pareses, eporus, muba ma hamu 9ai so porsea be hami ruas marnida angka pangulaon muna), jala habiari hamu ma Debata.!

    1. I ma da sintasintanta, lam tu dengganna ma angka na marhobas di huria i.
      Alai ndang holan i, lam ungkap ma tu hakristenon habatahon i. Denggan marpanganju, jala lambas rohana marnida angka na di humaliangna.
      Denggan amang, setuju di pandapotmuna i. Unang be masa di huria HKBP i parsualan dohot angka pargutugutuon, na mambahen tarhenos ruas marnidasa gabe batu partuktuhan.
      Tu torop na ma pangula na burju jala haposan, songon hamu, ruas ni huria i.
      Tabe

  3. Mansai toho turi-turian on Ito,tarlobi dihakristenon, sai niendehon alai sai busisaon.Pinaima angka turi-turian mardongan poda ate amang…Horas

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s