Na Bonar Do Jahowa Di Saluhut Angka Dalanna

Hundulhundul do sahali di jabuna sada natuatua, na margoar si Johannes, morhusari bodarina i taringot tu panogunoguon ni Debata di hajolmaon.
Ninna rohana ma : Nunga ganjang umurhu jala nunga leleng ahu ditano on, nunga godang diida matangku, gumodang muse dibege pinggolhu. Alai ndang tardok ahu na tingkos saluhutna i, godang do na sambar di rohangku, ndang huantusi dope hasintongan ni hata on : “Na bonar do Jahowa di saluhut angka dalanNa”.
Di na morhusari ibana songon i, pitpit ma matana, laos nok jala marnipi ma ibana. Dung i dibege ma di bagasan nipina i sada soara sian banua ginjang na mandok : “Hehe ma ho, Johannes! Laho ma ho madangadang di tano on, asa hupatorang tu ho angka dalan ni Debata”.
Jadi hehe ma tutu si Johannes i, dibuat ma tungkotna laho mordalan i, jadi sahat ma ibana tu tombak na bidang situtu.
Alai ndang sadia leleng nari, lilu ma ibana di bagasan tombak i, jadi hapusohan ma rohana. Binahen ni biarna, manjoujou ma ibana, anggiat ro manang ise, na mananda tombak i, na boi patuduhon dalan tu ibana, asa malua ibana sian hagogotanna i.
Dung i dung lam dipagogo ibana soarana, ro ma tutu sada halak na so tinandana mandapothon ibana, didok ma tu ibana : “Beta hita! Ai ndang tagamon botoonmu dalan na ture, ia so ahu donganmu di tombak on”.
Dung leleng nasida mordalan, nunga pola bot ne ari, sahat ma nasida tu bagas ni sada halak, na mangarahon nasida tu jabuna, dung i hundul ma nasida mangan minum rap dohot ibana. Mansai denggan ditamuei halak i nasida, ai tongon ari halalas ni roha di na sadari i di ibana, ninna, ai i pe mordenggan musuna dohot ibana, pola dilehon musuna i tu ibana panginuman sere na arga jala na uli, bahen tanda pordengganannasida.
Dung sun nasida na mangan i, modom be ma sahat ro di torang ni ari. Dung i mandok mauliate ma nasida tu partamue i, ala ni asi ni rohana di nasida. Alai di na naeng borhat nasida, diida si Johannes ma donganna i mambuat panginuman na arga i, ditabunihon tu bagasan barangna.
Jadi dung diida si Johannes pambahen ni donganna i, naeng ma gorahononna. Alai didok donganna i ma mandok ibana : “So ho, dalan ni Debata do i!” Sip ma ibana tutu laho mangihuthon donganna i.
Dung i sahat ma nasida muse tu jabu na asing; alai halak na jahat do nampuna jabu i. Na holit do rohana. Ai di na laho bongot nasida tu jabu i, dilagai jala diburai nampunasa jabu i ma nasida. Sigurbak ulu, na so olo mulaulaon do nasida, ninna, holan mangidoido manang manangko do diboto.
Dung i didok dongan ni si Johannes ma mandok ibana : “Ingkon laho ma hita sian on, ndang jadi tinggal dison hita”, huhut dipirpirhon ma orbuk na lohot di patna i.
Alai di na naeng laho nasida, dilehon ma panginuman na arga i tu parholit i. Longang situtu ma porholit i mida silehonlehon ni dongan ni si Johannes i na sai arga i. Alai ala sipapungupungu arta hian ibana, girgiran do rohana manjalo panginuman i.
Si Johannes pe, mansai longang rohana mida pambahen ni donganna i, pola didok : “Aha do na binahenmu disi? Ndang na ture i, ugasan ni na pogos dibuat ho, manambai hamoraon ni na mora”. Alai dipompomi donganna i ma ibana, didok ma : “Dalan ni Debata do i!”
Bodarina i bongot ma nasida muse tu sada jabu. Denggan do roha ni parjabu i manjangkon nasida tu jabuna i. Di na mangkatai nasida, dipaboa parjabu i ma parsorionna tu nasida dohot arsak ni rohana, ai lam sumurut do sinamotna, ninna, atik pe ringgas ibana di ulaonna.
Nunga pola digadis haumana, asa unang mate so mangan ibana dohot ripena. Holan jabuna i nama ugasanna, jala nang i ndang sadia arga be, ai na buruk do i, ndang tagamon tuk i pasaehon utangnasida.
“Olo, ia na padot ho songon na nidokmi, ba unang ma mandele ho, urupan ni Debata do ho disi, tumpahanna do ulaonmu”, ninna dongan ni si Johannes i.
Dung didok songon i, borhat ma nasida. Dung ruar nasida sian jabu i, diida si Johannes ma donganna i manantik hau api laho manurbu jabu i. “Unang!” ninna si Johannes, huhut ditiop donganna i, mangambat nian, asa unang saut disurbu bagas i.
Alai dipatulus do sangkapna, pintor gor ma jabu i jala didok ma tu si Johannes : “Sip ma ho, songon i do dalan ni Debata!” Muruk ma si Johannes mida donganna i di na mandatdati mordalan nasida, ai ndang diantusi ibana na binahen ni donganna i.
Di ari patoluhon sahat ma nasida tu sada jabu na asing. Dijangkon nampuna jabu i do nasida nian; alai sao murhing di bohina jala sai hohom do, ndang piga hata didok papuashon murukna. Alai na basa situtu do ibana anggo tu anakna; nasa lomo ni roha ni anakna i dipasaut do. Di na laho borhat nasida, dielekelek dongan ni si Johannes i ma parjabu i, asa dipatuduhon tu nasida dalam tu luat na naeng topotonnasida.
Alai ninna parjabu i ma : Ndang sadihari ahu patuduhon dalan tu hamu. Anakkon ma mandongani hamu; alai molo dung sahat hamu tu jambatan adui, loas hamu ma ibana mulak. Jamot bahen hamu ibana, unang tung masa manang aha tu ibana!
“Ramotan ni Debata do ibana”, ninna dongan ni si Johannes i mandok amana. Jadi didongani anakna i ma nasida. Las ma rohanasida ala ni i, ai na pantun do ibana morpangalaho jala anak na uli huhut.
Dung sahat nasida tu jambatan na nidok ni ama ni dakdanak i, naeng mulak ma dakdanak i nian. Alai didok dongan ni si Johannes i ma : “Ua dongani hami satongkinnari”. Jadi andorang di tongatonga ni jambatan i nasida, disoro ma dakdanak i, jala didabuhon ma tu batang aek i asa mate maup.
Tarrimas situtu ma si Johannes tu donganna i, dung diida pambahenna i jala didok : “Sibolis do ho! Ndang hea songon i dalan ni Debata. Tagamon mate so mangan ahu di tombak adui manang disoro babiat ahu unang donganmu ahu. Pargabus do ho, ingkon mago ma ho!”
Mandok songon i dope si Johannes i, diida ma muba rupa ni donganna i, tiur hian bohina jala saksak abitna. Songon surusuruan ni Debata do ibana idaon, jala didok ma mandok ibana : “Bege ma, Johannes asa hupatorang angka dalan ni Debata tu ho!”
Panginuman i na hubuat sian parjabu na parjolo i, na marrasun do i. jaloon ni halak parholit i ma upa ni dosana morhite sian i, laho mamangkesa bahen panginumanna, ai na tangkang do rohana, ndang olo ibana paubahon rohana. Ianggo halak na padot, jala na pogos i, luluan ni i do duitna di turanggong ni jabuna na matutung i, jadi dapotsa ma dua porrangguan mas na arga sahali na tinabunihon ni ompuna nahinan tusi. Ndang pola be holsoan ibana tu joloan on, ai tuk do i pasaehon utangna i, pajongjong jabu na imbaru dohot mormudumudu ibana ro di anakkonna.
Ia halak parpudi i, nampuna anak na hudabuhon tu batang aek i, porjahat do i, jala dakdanak i na gabe sibunu jolma ma i muse, aut pinasombu di tano on. Alai binahen ni hamamate ni anakna i gabe muba ma pangalaho ni porjahat i, jala dakdanak i nunga sahat tu banua ginjang tu jolo ni Debata.
Ndang haantusan ho nasailaon dalan hapistaran dohot habonaron ni Debata. Nunga diida ho deba nuaeng. Dibahen i pasabam ma roham, pasombu ma Debata paturehon langka ni na tinompana, ai ndang dung morsala Debata di gomgomanna i, ai manang dia pe dibahen, denggan do ujung ni i”.
Dung didok songon i, ndang tarida be surusuruan i, jala tarsonggot ma si Johannes sian nipina i.
Dipuji si Johannes ma holong ni roha ni Debata di hajolmaon : “O, bagas ni hagogok ni bisuk dohot parbinotoan ni Debata! Na so hasigatan do angka uhumna, jala na so habogasan do angka dalanna!”

Boenga-boenga Na Angoer; Rongkoman Sikola Porgindjang
p. 69-73

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s